ثريد لما رحت لكونسرت بتس من ورا اهلي وقررت اغامر مغامرة الحياة
الخطة جات فجأه من صديق السوء جاتني متحمسة قعرها تولع نار مومو تكفى خلينا نروح الكونسرت محد بيدري نسوي نفسنا خارجين سوا ونحلق للرياض!!! وقتها تحمست وخفت واقولها كيف من وين لنا تذاكر ماعندي فلوس تكفي بكره الكونسرت متى مدانا ابك وش تقولين انت
قالت ولايهمك ابك لاتدور زلتي وانت خابرني كفو كل شي عندي وجودك معاي المهم وقلت تم يابنت عمي والله ماردك
قسمنا المهام هيا تحجز تذاكر طيران وانا ادور تذاكر الحفل واستعنا بكل الاصدقاء من وراء الشاشات وفي غضون ساعات تم كل شي وانجزنا المهام
وجا وقت ندور كذبة ونسد ثغرات اختفاءنا ليوم كامل ومن حسن حظنا اننا سرابيت ودايما نخرج سوا وننام فبيوت بعض فكانت الكذبه المثاليه لنا
وبعد ما خططنا وانجزنا المهم قعدنا نستعد للمغامرة العظيمة ونشوف ايش نحتاج ناخذ وايش اللوك المناسب لليوم هذا لانو ياحننبسط ويتسجل فتاريخ حياتنا او ننمسك ونموت واحنا حلوين وبكامل اناقتنا
المهم وجا وقت النوم بس تحسبوني نمت؟
لا قاعده افكر باسوء السيناريوهات وكتبت وصيتي ونظفت جوالي عشان نهايتي تكون شريفة عفيفة لاتشويها شائبة
وصحيت اتراعد وقمت اتجهز واحط شدو وقليتر وروج احمر وقلوس وصرت ابرق وارعد والبس عباتي ونزلت انتظر ملكة المغامره تشرف ونروح للمطار سوا
وقمنا نحفظ الفانشانت ونشوف الفعاليات الي مجهزينها ونصارخ ونضحك ونبكي وبس اقلعت الطياره عم الصمت وجا وقت نفكر بعواقب قرارنا ومصيرنا وهل فيه مجال للتراجع
المهم بس وصلنا وهبطت الطياره جوع وحر وعطش قمنا رحنا نتغدا ونسولف ونتامل الحياة وارياظ وبناتهم الحلوين ودخلنا نتقهوى وننتظر الفارس المغوار يجيب تذاكرنا
واستلمنا تذاكرنا اخيرا وللمعلب ياسيدي ودينا طبعا وصلنا اخيرا لاستاد الملك فهد وكنا نردد الفانشانت ونحمي حناجرنا وكانت احلى اللحظات الي شاهدتها عيوني وسمعتها اذني
بس بدأ الحفل وشفت بتس بعيوني نسيت نفسي وحسيتني فحلم وبس اصارخ واضحك واصيح واتامل محيط العالم من حولي اعذروني يدي كانت ترجف كثير
المهم استمتعنا كثير وصورت لحظات ثمينة ماعلينا نجي للمصيبة بعد ما انتهت الحفلة الشوارع مقفله والدينا زحمة والهمج فكل مكان حسيت هذا الموت الحفلة خلصت وخرجنا منها ١١ وطيارتنا تقلع١ والدنيا ليترلي مقفلة فين حنلقى شخص يودينا المطار ويكون بكامل قواه العقلية
قمنا قررنا نمشي ونمشي ونبعد قدر المستطاع عن الزحمة وندور وسيلة للوصول بعد مده جا سواق هندي انقذ حياتنا من الموت والتشرد صح اخذ مبلغ وقدره عشان يوصلنا بس مو هذا المهم المهم نوصل
طول الطريق متوترين ونطالع فالوقت خايفين نتشرد فشوارع الرياض وتروح الطياره لين وصلنا والحمدلله وكان فيه وقت كافي ناكل ونتقهوى ونقابل بنات ونسالهم عن الكونسرت وعرفنا من كذا وحده اننا طيوز فسروال واحد وكلنا شردنا لعيون الاوبب
المهم عدا كل شي بخير ووصلنا واخيرا وعم قلبي الهدوء والامان ووقتها جاني اتصال من الوالدة تقولي فينك يا داشره الساعة اربعه الفجر متى ناويه تجي قلت يالله دقايق وانا عندج ووصلت البيت بامان وسلام وسقت افلام على اهلي لاتعد ولا تحصى وكنت بارعه فالتموية والتمثيل